VOGUE

Տքնաջան աշխատանքի արդյունքը հաղթանակի դափնին է. Մալխաս Ամոյան


Հայաստանը ներկայացնող՝ 67 կգ քաշային Մալխաս Ամոյանը Տրնավա քաղաքում, եզրափակչում 10։0 հաշվով հաղթեց Ուզբեկստանը ներկայացնող Մախմուդ Մախշիլոևին և հռչակվեց աշխարհի չեմպիոն: VOG.am-ի զրուցակիցն է Մալխաս Ամոյանը:


VOG.am- Մինչ ըմբիշ դառնալը, ինչպիսի՞ նախասիրություններ եք ունեցել:

Մալխաս- Դեռ մանկուց սիրել եմ ըմբշամարտը, ուրիշ այլ նախասիրություններ չեմ ունեցել: Դպրոցական ալլբոմներիս մեջ անգամ նկարում էի ըմբշամարտի գորգեր և պատվանդաններ:


VOG.am- Գիտենք, որ ձեր հորեղբայր Ռոման Ամոյանը ձեզ շատ է օգնում, այնուամենայնիվ, սպորտաձևի ընտրությունը ձե՞րն է, թե՞ հորեղբոր խորհրդով:

Մալխաս- Սիրելով ըմբշամարտը և տեսնելով հորեղբորս հաջողությունները սերս ավելի էր մեծանում այդ սպորտաձևի նկատմամբ և անպայման պայքարս ու ջանքերս ուղղել էի լավ ըմբիշ դառնալու նպատակին:

VOG.am- Նախկինում ի՞նչ մրցաշարերի եք մասնակցել, ձեր հաջությունների մասին խոսեք:

Մալխաս- Մրցաշարերի շատ եմ մասնակցել, դրանցից ամենակարևորը Եվրոպայի և Աշխարհի առաջնություններն են: Եղել եմ Եվրոպայի պատանիների առաջնության հաղթող, երկու անգամ աշխարհի խաղերի մրցանակակիր, երկու անգամ էլ եվրոպայի երիտասարդական խաղերի փոխչեմպիոն, ապա՝ հաղթող:


VOG.am- Ամենաշատն ո՞ւմ հետ կցանկանայիք մրցել. կա՞ այնպիսի մարզիկ, որի հետ ցանկանում եք ձեր ուժերը չափել:

Մալխաս- Հետևում եմ աշխարհում տեղի ունեցող բարձր մակարդակի խաղերին և այժմ էլ մասնակիցն եմ այդ խաղերի. Ունեմ շատ սիրված մարզիկներ, որոնց հետ կցանկանայի և հաճելի էր մրցել, բայց դեռ այդպիսի որոշում չեմ կայացրել, ապագան ցույց կտա:


VOG.am- Սլովակիայի Տրնավա քաղաքում դուք դարձաք հունահռոմեական ոճի ըմբշամարտի երիտասարդական առաջնության աշխարհի չեմպիոն, շնորհավորում ենք այդ կապակցությամբ. Մինչ հաղթանակի ազդարարումը դուք համոզված էիք ձեր հաղթանակում և ինչպիսի՞ն էր զգացողությունը այդ պահին երբ հնչեց ձեր անունը:

Մալխաս- Շնորհակալ եմ, շնորհավորանքի համար: Ուժերիս վրա վստահ էի, որովհետև գտնվում եմ լավ մարզավիճակում, ցանկությունս մեծ էր աշխատանքիս արդյունքը ցուցադրելու: Հաղթանակից հետո զգացողություններս անբացատրելի էին, խոսքերով չեմ կարող բնութագրել այդ գեղեցիկ ակնթարթները:

VOG.am- Հաղթանակի պատվանդանին հասնելը այդքան էլ հեշտ չէ. հեշտ ճանապարհ չեք անցել: Կխոսե՞ք հաղթահարած դժվարությունների, մարզիչների հետ կատարած աշխատանքների մասին:

Մալխաս- Բոլորն էլ գալիս են հաղթելու համար, բայց հաղթում է նա, ով տքնաջան և հետևողական աշխատում է իր վրա: Ինձ հետ աշխատել են մարզիչներս, հորեղբայրս և իմ ավագ ընկերներս, որոնց օգնությամբ շատ դժվարություններ եմ հաղթահարել. Ամեն ինչից ինձ զերծ եմ պահել, կենտրոնացել միայն մարզումներիս վրա: Հատուկ շնորհակալություն անձնական մարզիչ՝ Համլետ Հովհաննիսյանից, հավաքականի մարզիչներ՝ Արմեն Բաբալյանից, Մովսես Կարապետյանից, Ազատ Ամոյանից, Արսեն Մակվեցյանից, Ռոման Ամոյանից և ավագ ընկերներ՝ Արսեն Ջուլֆալակյանից, Մաքսիմ Մանուկյանից և Արթուր Ալեքսանյանից:


VOG.am- Առաջիկայում ինչպիսի՞ն են ծրագրերը և ի՞նչ մրցաշարերի եք պատրաստվում մասնակցել:

Մալխաս- Այժմ մասնակցում եմ գերմանական լիգայի մրցաշարերի, այնուհետև կլինեն Հայաստանի առաջնության հավաքներ և ըստ դրա էլ կորոշվի իմ հետագա անելիքները:

VOG.am-ը պատրաստել է 10 բլից հարց.


Բնութագրեք ձեզ...

Ամաչկոտ:


Ի՞նչ սովորություններ ունեք:

Շատ եմ շտապում:


Ձեր ամենամոտ ընկեր...

Բաց թողնենք այս հարցը:


Սիրած մարզաձևը...

Բասկետբոլ:


Ի՞նչ եք սիրում ուտել:

Կեսար:

Սիրած պատմական կերպար...

Սասունցի Դավիթ:


Սիրելի քաղաք...

Լաս Վեգաս:


Սիրելի կարգախոս...

Եկա, տեսա, հաղթեցի:


Ի՞նչ երբեք չեք անի:

Չեմ տխրի:


Եթե կախարդական փայտիկ ունենայիք ի՞նչ կանեիք:

Այնպես կանեի, որ երկրում հաստատվեր խաղաղություն, ո՛չ պատերազմին և կբուժեի բոլոր հիվանդներին:


Interview: Tatka Musheghyan

+374 91 105 155

VOG.am © 2020․ Բոլոր հեղինակային իրավունքները պաշտպանված են: